بانگِ درا

<p id="isPasted">بانگِ درا</p><p>علاّمہ محمّد اقبال</p><p>فہرست</p><p>حصہ اول ـــــــ 1905 تک</p><p>ہمالہ</p><p>اے ہمالہ! اے فصیل کشور ہندوستاں</p><p>چومتا ہے تیری پیشانی کو جھک کر آسماں</p><p>تجھ میں کچھ پیدا نہیں دیرینہ روزی کے نشاں</p><p>تو جواں ہے گردش شام و سحر کے درمیاں</p><p>ایک جلوہ تھا کلیم طور سینا کے لیے</p><p>تو تجلی ہے سراپا چشم بینا کے لیے</p><p>امتحان دیدۂ ظاہر میں کوہستاں ہے تو</p><p>پاسباں اپنا ہے تو ، دیوار ہندستاں ہے تو</p><p>مطلع اول فلک جس کا ہو وہ دیواں ہے تو</p><p>سوئے خلوت گاہِ دل دامن کش انساں ہے تو</p><p>برف نے باندھی ہے دستار فضیلت تیرے سر</p><p>خندہ زن ہے جو کلاہِ مہر عالم تاب پر</p><p>تیری عمر رفتہ کی اک آن ہے عہد کہن</p><p>وادیوں میں ہیں تری کالی گھٹائیں خیمہ زن</p><p>چوٹیاں تیری ثریا سے ہیں سرگرم سخن</p><p>تو زمیں پر اور پہنائے فلک تیرا وطن</p><p>چشمۂ دامن ترا آئینۂ سیال ہے</p><p>دامن موج ہوا جس کے لیے رومال ہے</p><p>ابر کے ہاتھوں میں رہوار ہوا کے واسطے</p><p>تازیانہ دے دیا برق سر کہسار نے</p><p>اے ہمالہ کوئی بازی گاہ ہے تو بھی ، جسے</p><p>دست قدرت نے بنایا ہے عناصر کے لیے</p><p>ہائے کیا فرط طرب میں جھومتا جاتا ہے ابر</p><p>فیل بے زنجیر کی صورت اڑا جاتا ہے ابر</p><p>جنبش موج نسیم صبح گہوارہ بنی</p><p>جھومتی ہے نشۂ ہستی میں ہر گل کی کلی</p><p>یوں زبان برگ سے گویا ہے اس کی خامشی</p><p>دست گلچیں کی جھٹک میں نے نہیں دیکھی کبھی</p><p>کہہ رہی ہے میری خاموشی ہی افسانہ مرا</p><p>کنج خلوت خانۂ قدرت ہے کاشانہ مرا</p><p>آتی ہے ندی فراز کوہ سے گاتی ہوئی</p><p>کوثر و تسنیم کی موجوں کی شرماتی ہوئی</p><p>آئنہ سا شاہد قدرت کو دکھلاتی ہوئی</p><p>سنگ رہ سے گاہ بچتی ، گاہ ٹکراتی ہوئی</p><p>چھیڑتی جا اس عراق دل نشیں کے ساز کو</p><p>اے مسافر دل سمجھتا ہے تری آواز کو</p><p>لیلی شب کھولتی ہے آ کے جب زلف رسا</p><p>دامن دل کھینچتی ہے آبشاروں کی صدا</p><p>وہ خموشی شام کی جس پر تکلم ہو فدا</p><p>وہ درختوں پر تفکر کا سماں چھایا ہوا</p><p>کانپتا پھرتا ہے کیا رنگ شفق کہسار پر</p><p>خوشنما لگتا ہے یہ غازہ ترے رخسار پر</p><p>اے ہمالہ! داستاں اس وقت کی کوئی سنا</p><p>مسکن آبائے انساں جب بنا دامن ترا</p><p>کچھ بتا اس سیدھی سادی زندگی کا ماجرا</p><p>داغ جس پر غازۂ رنگ تکلف کا نہ تھا</p><p>ہاں دکھا دے اے تصور پھر وہ صبح و شام تو</p><p>دوڑ پیچھے کی طرف اے گردش ایام تو</p><p><br></p><p><br></p><p>گل رنگیں</p><p><br></p><p><br></p><p>تو شناسائے خراش عقدۂ مشکل نہیں</p><p>اے گل رنگیں ترے پہلو میں شاید دل نہیں</p><p>زیب محفل ہے ، شریک شورش محفل نہیں</p><p>یہ فراغت بزم ہستی میں مجھے</p>